"Абысындар" комедиялык тасмасынын бет ачары болуп өттү (фото)

Тасма Ысык-Көл облусунда тартылган.

Бүгүн, 20-октябрда Бишкектеги Тарых музейинде "Абысындар" комедиялык тасмасынын бет ачары болуп өттү. Тасмада бир үй-бүлөдөгү үч абысындын күнүмдүк жашоосу чагылдырылып, анын негизинде өлкөдөгү аялдардын жашоо образы көрсөтүлгөн. Ошол эле учурда тасманы койгон топ ар бир эпизодду күлкүлүү кылып тартып, чындыкты жеткирүүгө аракет кылган. Анан да ашыктык тематикасына өзгөчө токтолушуп, азыркы коомдогу аялдардын өзүнөн кичүү курактагы жигиттерге турмушка чыгып жатышканы, эркек кишилердин өзүнөн бир топ кичүү кыздарга ашык болгону учкай көрсөтүлгөн.

Тасмада үч абысындын ролун актрисалар Ырыс Жоомартова (үйдүн улуу келини Калбүбү), Жамиля Муратова (ортончу келини Береке) жана Асел Нурланова (жаңы келген келини Асел) жараткан.

Режиссёр Мурат Мамбетов тасма тартууда актёр-актрисалардын чеберчилигинен улам кыйынчылыктар жаралбаганын айтты. "Баарыбыз бир эле үйдө болуп, тасманы бат-баттан эле тарттык. Актёр-актрисалардын чеберчилигинен улам да кыйынчылыктар болгон жок, болгону үндү жандуу бергендигибизден тегерек-четтеги иттердин үргөнү, уйлардын мөөрөгөнү үндү жазууга тоскоолдук кылып жатты. Ошентсе да ийгиликтүү тартылды. Кино Ысык-Көл облусунун Чоң-Жаргылчак айылында тартылып, ал жердеги жергиликтүү тургундар чыгармачылыкка колдоо кылып, жардам берип жатышты",- деди режиссёр.

Тасма актриса Ырыс Жоомартованын идеясынын негизинде жаралган. Автор тасмада үч абысындын ортосундагы жек көрүү, көрө албастык сезимдерди берүү менен бүгүнкү турмуштук абалды чагылдыруу максатын көздөгөнүн айтты. "Мен өзүм улуу келиндин ролун ойноп, жаңы келген келинге күн көрсөтпөй койгон абалды жараттым. Кинодо улуу келин дайыма шаарда жашагысы келип, сулуулугун сактап, тегерек-четиндегилердин баарынын көңүлүн өзүнө бурдургусу келип турууну самайт. Ошол себептен шаардан келген жаңы келинди теңсинбегенге аракет кылып, болушунча көрө албастыкты көрсөтөт. Жашоодо ал аял небере багып эле, тынч жашашы керек болчу. Акырында ал нерсени түшүнүүгө аракет кылып, өз ордун биле алат",- деди идеянын автору.

Тасманын бет ачарына кино тармагынын адистери, сынчылар, күйөрмандар жана тасмада образ жараткан актёр-актрисалар келишкен.