Селин Диондун күйөөсү туулган күнүнө 2 күн калганда каза болду

Селин Диондун күйөөсү Рене Анжелил туулган күнүнө 2 күн калганда рак оорусунан каза болду. Бул тууралуу ырчынын интернеттеги расмий баракчасына бүгүн жазылды: "Терең кайгыруу менен кабарлайбыз, Рене Анжелил бүгүн эртең менен 73 жаш курагында өзүнүн Лас-Вегастагы үйүндө каза болду. Үй-бүлөсү аза күтүүдө, азырынча алардын жеке жашоосуна кийлигишпөөнү суранышат".

Селин Дион Рене Анжелил менен 12 жашында таанышкан. Келечектеги ырчынын апасы музыкалык менеджер Рене Анжелилге анын ырларын жиберген. 38деги Рене Селиндин мыкты ырчы болоруна көзү жетип өзүнүн үйүн күрөөгө коюп, анын алгачкы "Кудайдын үнү" аттуу ырын жаздырган. Ошондон баштап Селин ырчы катары тааныла баштаган. Алар 1994-жылы жаш айырмалары тууралуу сындан коркуп жашыруун түрдө баш кошушкан.

1999-жылы Рененин тамагына операция жасалып, 2013-жылы оорусу кайрадан башталган. Кайталап операция жасалганы менен, жардамы тийген эмес.

Эскерте кетсек, рак оорусунан ушул жумада жылдыздар арасында 3 адам каза болду.

Автор: Үмүт Абдраимова