МЕДИА-ПОРТАЛ: "Кыздын сыры" ырын жаңылап ырдап чыккан Айдана Дека: "Алина Жетигенова экөөбүздүн ырдаганыбыз бири-бирине окшошпойт"

Кыргыз шоу дүйнөсүндөгү жаңыдан чыгып келе жаткан таланттуу, сулуу ырчылардын бири - Айдана Дека. Анын "Кыздын сыры" ырына тартылган клиби "Медиа-портал" бөлүмүндөгү көрүүчүлөр арасында катуу талкууга алынган. Ал эми ушул эле ыр Алина Жетигенованын аткаруусунда бир кезде хит болгон. "Канча адам болсо, ошончо ой-пикир бар" дегендей, клипке карата жакшы да, жаман да ойлор айтылган.

Жаш ырчы Айдана Дека клип тууралуу мындай дейт: "Бул менин чыгармачылыгымдагы экинчи клип. Клиптин идеясын, тартуучу жайды, андагы актёрлорду - баарын өзүм тандадым. Режиссёру - Эрнист Сыдыков. Клип эмеректер сатылчу дүкөндө тартылган. Тартуу учурунда эл ары-бери өтүп, тоскоолдук жаратып жатты. Өзүмдү ыңгайсыз сезип, 1-2 мүнөттүк кадрды алуу үчүн эле көп убакыт короттук. Ооба, ырга, клипке карата түрдүү сын-пикирлер айтылды. "Кыздын сыры" ырын алгач ырдап чыккан Алина Жетигенова өзүнүн стилинде ырдаган. Бул ырды Алина эже угуп көрүп, "башкача ырдаптыр" деп жактырыптыр. Экөөбүздүн ырдаганыбыз такыр башка, бири-бирине окшошпойт. Обонун башкачараак ырдаганымды кээ бирөөлөр "туура эмес ырдаган" деп жатышты. Бирок андай эмес, мен болгону өз стилимде ырдаганым үчүн ошондой сезилгендир".

Айдана Деканын "Кыздын сыры" ырынын клибин бул жерден көрүңүз.

Автор: Турсунай Алымкулова