Парламенттин комитети Батукаев боюнча депутаттык комиссияны көзөмөлдөн алды

Парламенттин Укук тартиби жана кылмыштуулук менен күрөшүү комитети кримавторитет Азиз Батукаевдин камактан бошоп, өлкөдөн чыгып кетишин иликтеген депутаттык комиссияны көзөмөлдөн алды. Чечим 25-апрелде комитеттин жыйынында кабыл алынды.

"Бул комиссиянын иши бүткөн, тийиштүү мекемелерден жооптор алынган. Ошондуктан күн тартибинен алып салсак болот", - деди комитеттин төрагасы.

Эскерте кетсек, Батукаев 2013-жылы соттун чечими менен абактан чыгарылып, Кыргыз мамлекетинен чыгып кеткен. Аны аэропортко чейин Жаза аткаруу мамлекеттик кызматынын кортежи коштоп барып узаткан. Окуяны иликтөө үчүн депутаттык комиссия түзүлүп, жыйынтыгында бир катар чиновниктерди кызматтан бошотууну сунуштаган. Бирок Батукаевди бошотууга катыштыгы бар деп аттары аталган чиновниктердин көбү жазасыз калган. Бул окуядан кийин ошол маалдагы вице-премьер Шамиль Атаханов менен акыйкатчы Турсунбек Акун кызматтан бошоп, калгандарына кол тийген эмес. Айрымдары тескерисинче, кызматынан жогорулаганы айтылып жүрөт.

Автор: Автандил Добулбеков