Жалал-Абад облусунун айрым райондорунда катуу шамал жүрүп, турак жайлардын чатырын учурду

Жалал-Абад облусунун аймактарында катуу шамал жүрүп, турак жайлардын жана социалдык имараттардын чатырын учурду. Бул тууралуу бүгүн, 29-майда Өзгөчө кырдаалдар министрлигинин басма сөз кызматынан билдиришти.

Маалыматка ылайык, Токтогул районунда ылдамдыгы секундасына 23 метрге жеткен катуу шамал катталып, Токтогул шаарчасында 1 үйдүн чатырынын 270 чарчы метр бөлүгүн, райондун борбордук ооруканасынын 180 чарчы метр чатырын шамал учурган. Жабыркагандар болгон эмес.

"Катуу шамал 28-май күнү Ала-Бука районунда да катталган. Ылдамдыгы секундасына 20 метрге жеткен. Ак-Там айылындагы мөмө-жемиш кургатуучу кичи сарайдын 330 чарчы метр чатырын жыгачы менен кошо шамал учуруп, жараксыз абалга келтирген. Ошондой эле Жапа-Салды айылындагы 1 сарайдын чатырын жыгачтары менен шамал учурган. Сузак районунда да шамал жүрүп, 2 кабаттуу үйдүн чатырын учурган. Кызыл-Суу айылында 11 турак жайдын жалпы 30 даана шиферин жана 11 сарайдын чатырын учуруп кеткен", - деп билдиришти аталган кызматтан.

Автор: Акназар Сулайманкулов
Фото: Интернеттен алынды