Кыргыздын Билим берүү министрлиги кыргыз-түрк лицейлери тууралуу Түркияга "бул басым көрсөтүү" деп жооп берди

Билим берүү жана илим министрлиги “Сапат” окуу жайлары тууралуу Түркияга жооп берди. Бул тууралуу бүгүн, 15-августта аталган министрликтин басма сөз кызматы билдирди.

Маалыматка ылайык, министрлик Түркиянын билим министринин орун басары Орхан Эрдемдин айткандарын кыргыз коомчулугуна басым көрсөтүү катары көрүп, аталган билим берүү мекемелерин дискредитациялоо аракети катары кабыл алган.

“Өлкөдө “Сапат” билим берүү мекемелери 1992-жылдан бери иштеп келет. Бул жылдар аралыгында он миңдеген жаран татыктуу билим алышты. Ошондой эле алар түрк тилин жана маданиятын үйрөндү. Алар эки өлкөнүн элдерин байланыштырган көпүрө болуп эсептелет”.

Мындан тышкары “Сапатты” террордук уюмдар менен салыштырган туура эмес экени айтылат.

Эске салсак, 11-августта Орхан Эрдемдин ТIKA агенттигинин жыйынында Кыргыз мамлекетинин "Сапат" билим берүү мекемесинин окуучулары Түркияга киргизилбеши мүмкүн экенин айткан.

"Туугандарыңарга, досторуңарга жана тааныштарыңарга айткыла, алар бул террористтик мектептерге барышпасын. Алар Түркияга келишсе, визалары жокко чыгарылуу ыктымалдыгы жогору. Түркияда ал мектепте окугандардын туугандары да кубаныч менен кабыл алынышпайт", - деген ал.

Автор: Жылдыз Джускембаева
Фото: Интернеттен алынды