Алмазбек Атамбаев миллиардер Бинод Чаудхари менен Кыргызга инвестиция тартуу тууралуу сүйлөштү

Бишкекте Ак илбирсти коргоо форумуна катышкан миллиардер, "Chaudhary Group" компаниясынын башчысы Бинод Чаудхари 26-августта президент Алмазбек Атамбаев менен жолугушту.

Жолугушууда Кыргызга инвестиция тартуу жаатында сүйлөшүү жүргөнүн президенттик аппарат кабарлады. "Биз Кыргыз жеринде ири реформалар жүрүп жатканын көрүп турабыз. Бул ишкерлерге бекем ишеним берет", - дейт Чаудхари.

Сейрек кездешкен жапайы жаныбарларды, анын ичинде ак илбирсти коргоо жаатында кызматташуу, тажрыйба алмашуу тууралуу да пикир алышуу болгону айтылды.

"Chaudhary Group" - көп улуттуу холдинг компания. Башкы кеңсеси Непалда жайгашкан. Компания "Taj Safaris Wildlife Lodges" сафари паркына да ээлик кылып, Непал жана Индиядагы жапайы жаныбарларды коргоо жаатында иш жүргүзөт.

Автор: Автандил Добулбеков