Депутат Сузакта жер көчкүдөн жабыркагандар көчүрүлүп барган жерде таза суу жок экенин айтты

Депутат Тазабек Икрамов Сузак районунда жер көчкүдөн жабыркагандар көчүрүлүп барган жерде таза суу жок экенин айтты. Бул тууралуу ал бүгүн, 7-сентябрда Жогорку Кеңештин жыйынында билдирди.

"Сузак районунда жер көчкүдөн жабыркагандарга жер бөлүнүп берилип, бала бакча курулуп жатат. Бирок эң негизги маселе чечилбей калыптыр. Бул таза суу маселеси. Кечээ айылдын эли менен жолукканда ушул маселени көтөрүштү. Элди таза суусу жок жерге көчүрүп баруу туура эмес. Жогоруда айтылган маселелерди тез арада өкмөткө жеткирип, чечүү керек", - деди ал.

Мындан тышкары Икрамов Талас облусуна караштуу Миң-Булак айылынын тургундарынан кайрылуу түшкөнүн айтты. "Окуучулар 8-9 чакырым алыстыкта жайгашкан Чалдовар мектебине жөө каттап жатышыптыр. Балдар караңгыга калып калган учурлар да кездешүүдө. Чалдовар мектеби 1929-жылы салыныптыр, жаңы мектепке муктаж экен. Ал эми айылдын окуучуларына шарт түзүп берүү зарыл. Транспорт маселесин чечип берүү керек", - дейт депутат.

Автор: Жылдыз Джускембаева
Фото: Интернеттен алынган