БШК: "Калмаматов, Салянова, Иминовдун ордуна депутат болуп келчү талапкерлер боюнча мамлекеттик органдар суроо-талаптардын жообун ушул аптада беришет"

"Жыргалбек Калмаматов, Аида Салянова, Фархат Иминовдун ордуна депутат болуп келчү талапкерлер боюнча мамлекеттик органдар суроо-талаптардын жообун ушул аптада беришет", - деп бүгүн, 12-мартта SUPER.KG порталына Борбордук шайлоо комиссиясынын төрайымынын орун басары Абдыжапар Бекматов билдирди.

Анын айтымында, БШК талапкерлердин соттолгон же соттолбогонун текшерүү жана башкаларды тактоо үчүн тиешелүү мамлекеттик органдарга суроо-талаптарды жөнөткөн. "Мамлекеттик органдар суроо-талаптын жообун бере турган убакыт келди. Алар бир-эки күндүн ичинде жооп жөнөтүшөт. Андан кийин биз мандат берүү маселесин карайбыз", - деди Бекматов.

Белгилей кетсек, 3-мартта БШК Аида Салянова менен Фархат Иминовду мандатынан ажыраткан. 19-январда комиссия каза болгон Жыргалбек Калмаматовдун депутаттык ыйгарым укуктарын токтоткон. Жогорку Кеңештин "Кыргызстан" фракциясынан депутат Жыргалбек Калмаматов ушул жылдын 1-январында каза болгон.

Аида Салянованын ордуна Гүлнара Самат-Клара келиши мүмкүн. Анын мурдагы аты-жөнү Клара Кабилова. Жыргалбек Калмаматовдун ордуна Насыр Мусаевдин келиши күтүлүүдө. Ал эми Фархат Иминовдун мандаты Марлен Маматалиевге тапшырылышы мүмкүн.

Автор: Жылдыз Джускембаева