Нарын. Облуста 20 адам "Хизбут-Тахрир" уюмунун жактоочулары катары каттоодо турат

Нарын ОИИБинин басма сөз кызматынын маалыматы боюнча облус боюнча 20 адам "Хизбут-Тахрир" диний-экстремисттик уюмунун жактоочулары катары каттоодо турушат. Алардын ичинен 15 жаран Нарын шаарынан, ал эми 5 адам Ат-Башы районунан катталган. Алардын ичинен 4 адам сот жообуна тартылган. Ошондой эле "Салафит" диний уюмунда 2011-жылдан бери 3 адам каттоодо турса, үстүбүздөгү жылдын 9 айында 1 адам каттоого алынып, алдын алуу иштердин натыйжасында 4 адам каттоодон чыгарылып, бул уюмдагылардын үстүнөн тынымсыз оперативдик көзөмөлдөө иштери жүргүзүлүүдө. Мындан сырткары диний экстремизмди алдын алуу максатында Ак-Талаа, Жумгал, Кочкор райондорунда жана Нарын шаарында тегерек столдор өткөрүлүп, ММКларда чагылдырылган. Облустун аймагында мыйзамсыз миграциянын алдын алууда жүргүзүлгөн оперативдик-профилактикалык иштердин натыйжасында КРнын миграция мыйзамдарын бузган жалпы 68 чет элдик жаранга КРнын Административдик кодексинин 390-беренесинин 1-бөлүмү менен бардыгы 54000 сомдук айыптар салынып, толугу менен өндүрүлгөн. Үстүбүздөгү жылдын 9 айында облустук Ички иштер органдарынын тергөө аппараттарынын өндүрүшүндө жалпы 508 кылмыш иштери ачылып, 443 кылмыш иши боюнча алдын ала тергөө бүтүп, алардын 364 иши соттордун кароосуна жиберилген.

Автор: Гүлжан Асанкожоева