Бишкек шаардык кеңешинин төрагасы азырынча мэрлик кызматка талапкерлер жок экенин айтты

Бишкек шаардык кеңешинин төрагасы Алмаз Кененбаев азырынча мэрлик кызматка талапкерлер жок экенин айтты. Бул тууралуу ал бүгүн, 13-июлда журналисттердин суроолоруна жооп берип жатып билдирди.

Анын айтымында, аталган кызматка талапкерлер эми каралып баштайт. "3 күндүн ичинде премьер-министр шаардык кеңеш жөнөткөн токтомду карап чыгышы керек. Эгерде мэрге ишеним көрсөтпөө чечимин колдосо, Борбордук шайлоо комиссиясы шайлоо күнүн белгилейт", - деди ал.

Бүгүн шаардык кеңеш мэр Албек Ибраимовго ишеним көрсөтпөө чечимин бир добуштан кабыл алды. “Борбор калаанын статусу жөнүндө” мыйзамына ылайык, Бишкек шаардык кеңеши тарабынан мэрге ишеним көрсөтүлбөгөн учурда премьер-министр аны кызматынан мөөнөтүнөн мурда бошотуу жөнүндө чечим кабыл алууга же шаардык кеңешинин чечими менен макул болбоого укуктуу.
Шаардык кеңеш мэрге кайра ишеним көрсөтпөө чечимин кабыл алса, 3 айдын ичинде премьер-министр аны ээлеген кызматынан бошотот.