Футзал боюнча клубдар арасындагы Азия чемпиондугу: Оштун "EREM" командасы экинчи беттешинде ири эсепте жеңилип калды

Индонезиянын Жакарта шаарында өтүп жаткан футзал боюнча клубдар арасындагы Азия чемпиондугунда Оштун "EREM" командасы экинчи беттешинде ири эсепте жеңилип калды.

Аталган мелдеште 16 өлкөнүн чемпиондору катышып, алар 4 тайпага бөлүнүп күч сынашууда. Анда Кыргыздын "EREM" командасы "С" тайпасында жайгашып, таиланддык "Чонбури Блувейв", катардык "Аль Салия" жана австралиялык "Вик Вайперс" командаларына кез келген.

2-турдун алкагында "EREM" командасы Таиланддын "Чонбури Блувейв" командасы менен беттешкен. Беттештин жүрүшүндө "Чонбури Блувейв" 5 гол киргизсе, "EREM" командасы 1 гол менен гана жооп бере алган. "Чонбури Блувейв" бул жеңиш менен алгачкылардан болуп кийинки этапка өттү.

"С" тайпасындагы катардык "Аль Салия" менен австралиялык "Вик Вайперс" командаларынын беттеши 4:2 эсеби менен аяктап, "Вик Вайперс" кийинки этапка өтүү мүмкүнчүлүгүн жоготту.

Кезектеги турда "С" тайпасында плей-офф баскычына акыркы жолдомо ойнотулмакчы. Анда Оштун "EREM" командасы австралиялык "Вик Вайперс" менен кез келсе, "Чонбури Блувейв" "Аль Салия" менен беттешет.

"С" тайпасындагы беттештердин тизмеси:

1-тур, 2-август:

"Чонбури Блувейв" (Таиланд) – "Вик Вайперс" (Австралия) - 9:2;

"Аль Салия" (Катар) – "EREM" (Кыргыз Республикасы) - 1:4.

2-тур, 4-август:

"EREM" (Кыргыз Республикасы) – "Чонбури Блувейв" (Таиланд) - 1:5

"Вик Вайперс" (Австралия) – "Аль Салия" (Катар) - 2:4

3-тур, 6-август:

17:00 "Чонбури Блувейв" (Таиланд) – "Аль Салия" (Катар);

17:00 "EREM" (Кыргыз Республикасы) – "Вик Вайперс" (Австралия).

Автор: Нурсултан Нурболот уулу
Фото: АФК