Кечээ Кара-Балтада жаш ишкерлер үчүн медиа тур өткөрүлдү

Кечээ Эл аралык өнүктүрүү боюнча АКШнын агенттиги (USAID) Кара-Балта шаарындагы жаштар иштеткен ишканалар менен таанышуу үчүн медиа тур өткөрдү. Аталган агенттиктин «Jasa.kg» долбоору аркылуу колдоого алынган Эл аралык жаштар фондусу жаштарды бизнес жүргүзүүгө үйрөтүп келет. 2012-жылдын апрель-июнь айларында Жалал-Абад, Кара-Балта, Ош жана Бишкектин жаңы конуштарынан келген 350дөн ашуун жаштар айыл жергесинде ишкердикти өнүктүрүү боюнча курска катышып, өздөрүнүн бизнес- долбоорлорун тартуулашкан. Болжол менен 200гө жакын бизнес-долбоорлор каралып, алардын ичинен 31и тандалып, өздөрүнүн бизнесин өнүктүрүү үчүн 500 доллар өлчөмүндөгү каражат алышкан. Кара-Балтадагы бизнес-долбоордун бири кагаздан жасалчу көркөм чыгармаларга (рюше) арналган болсо, экинчиси англис тили боюнча өттү. Ишкердик курсунан өткөн Кара-Балта шаарынын студенти Азиза Халбекова грант алууга жетишкен өз долбоору тууралуу мындай дейт: “Биз рюше искусствосун коомчулукка жайылтабыз. Бул Европа өлкөлөрүндө кеңири тараган жана ал бул жердеги көптөгөн жаштарды бош убакытта кагаздан чыгармаларды жасоогo тартат”.

Автор: Айдай Асанбекова