Жалал-Абад. КРнын туңгуч Премьер-министри Насирдин Исановдун эстелиги өзү каза болгон Ош-Бишкек жолунун боюна тургузулат

Белгилүү мамлекеттик ишмер, КРнын туңгуч Премьер-министри Насирдин Исановдун 70 жылдыгына карата анын айкели Ош-Бишкек жолунун 513-чакырымында тургузулат. Мындай маалыматты өкмөттүн Жалал-Абад облусундагы өкүлчүлүгүнүн басма сөз кызматы билдирди. Белгилей кетчү жагдай, Н.Исанов Ош-Бишкек унаа жолунун дал ушул 513-чакырымында автокырсыктан каза болгон. Ал эми мындай демилгени колдоп Ноокен районунун Ж.Момбеков айыл өкмөтүнүн жергиликтүү депутаттары эстелик үчүн трассанын боюнан 252 чарчы метр жер бөлүп беришти. Бүгүн, 11-июлда Жалал-Абад облусунун башчысы Жусубали Торомаматов аталган жерде болуп, жүргүзүлүп жаткан иштер менен таанышты. Исановдун айкелин тургузуу үчүн Жалал-Абад облусундагы архитекторлордун арасында сынак жарыяланып, жеңүүчүгө облустагы өкүлчүлүк тарабынан 20 миң сом берилет. Эстелик жасоого кеткен чыгымды демөөрчүлөр, инсандын жакындары жана жергиликтүү бийлик көтөрөт.

Автор: Кенже Тынымбек кызы