Бишкектин четинде кыш куюп жан баккандар

Кардар келсе, даяр жумушчулар кышты унаага жүктөп берүүгө да даяр

Даяр болгон кыштар. Кардар келсе соодалашып 2,9-3 сомдун тегерегиндеги баага сатып алат

Атасына жардам берген кичинекей кыз кыш оодарып жатат

Кыштын бат кургашы үчүн аны оодарыштырып турушат

Кыштар күн ысыкта 2-3 күндө эле кургайт

Ысыктан чарчаган жумушчулар "танаписте"

Келечек жаңы конушунда ондогон үй-бүлөнүн короосу жайында ушундай көрүнүштө болот

Кыш жасоодогу негизги куралдын бири - кетмен

Калыптын жаңысын базардан 400-450 сомго сатып алышат

Жумушчулардын кол ишке көнүп бүткөн

Ичин кум менен чайкап алса кыштан кирпич оңой ажырайт жана формасын жоготпой түшөт

Бул кум да жөн эле төгүлгөн эмес. Ичин кум менен чайкап алса кыштан кирпич оңой ажырайт жана формасын жоготпой түшөт

Далай имараттын дубалын курай турган курулуш материалы даярдалууда

Калыпты ичиндеги ылайы менен көтөрүп барууга оор. Ошондуктан минтип бир башына жип байлап алып сүйрөп барышат

Кыш куюуга жалданып иштеген балдар ар бир кыш үчүн 1 сом 30 тыйындан алышат

Кыш жасоого даяр ылай

Топуракты алгач ушинтип даярдап, үстүнө суу куюшат. Клеенка менен оролгон ылай топурак бир суткадан кийин кыш жасоого даяр болот экен

Ылайдан кыш куюп сатуу Бишкектин Келечек жаңы конушундагы ондогон үй-бүлөнүн жылдагы иши. Жаз келери менен короо-жайын бошотуп кыш куюуга даярдап, күзгө чейин кыш жасашат. Айрымдары атайын жалданма жумушчу жалдап иштетишет. "Бир КамАЗга жүктөлгөн топуракты 1500 сомго сатып алабыз. Андан 1000 кыш жасалат. Кыштын бир даанасын 3 сомдон сатсак 3000 сом болот. Жайында ушинтип иштеп балдарга окуу кийими, кышкыга отун, көмүр даярдоого акча топтойбуз",- дейт сүрөткө түшкүсү келбеген Акылбек аттуу мырза. Бир КамАЗдагы топуракты бир күндө түгөтүп койсо болот экен. Ал эми кыш куюуга жумушчу жалдап иштетсе, ар бир жумушчуга 1,3 - 1,4 сомдон төлөп беришет. "Алгач топуракка суу куюп үстүн клеёнка менен ороп, нанга камыр ачыткандай эле ачытабыз. Минтсек кыш оңой жасалат. Көбүнчө өзүм жасайм, жумушчу иштетпейм. Жумушчулар эптеп эле ылайды түгөтүш үчүн аракет кылышат. Бирок кардар алып жаткан товарынын сапатын карайт да. Ал деле стандартка туура келген, бекем кышты сатып алгысы келет",- дейт Акылбек мырза. Ал эми эртеден кечке муздак ылай кармап иштөөнүн ден соолукка заяндуулугу тууралуу буларды айтты: "Иш оор. Катуу чарчаган күндөрү түнү менен белим ооруп уктай албай чыгам. Бирок, айла жок, үй-бүлөнү багыш керек. Башка иш да жок өлкөдө. Кышкыга отун-сууну камдап коюп Орусияга барып иштеп келсемби деп турам".

Автор: Автандил Добулбеков
Фото: Автандил Добулбеков