Турсунбай Бакир уулу: "Менин уулумду пара алды деген адам өзү камакта жатат, бир депутаттын мурдагы күйөө баласы болчу"

“Уулума карата чыгарылган Биринчи Май райондук сотунун чечимине каршы 10 күндүн ичинде жогорку инстанцияга арызданабыз”,- дейт “ири өлчөмдө пара алган” деп айыпталып 12 жылга эркинен ажыратылган Каныбек Бакировдун атасы, ЖКнын депутаты Турсунбай Бакир уулу. 31-июлда Биринчи Май райондук сотунун судьясы Марат Ибраев тарабынан К.Бакировго карата 12 жылга эркинен ажыратуу өкүмү чыккан. “Уулумдун үстүнөн арыз жазган адам өзү 2 адамды өлтүрүп, абакта отурат. Өмүр бою эркинен ажыратылган. Атын атабай эле коёюн, мени менен чогуу иштеген депутаттын мурдагы күйөө баласы болчу. Ал уулумдан карызга акча сураса, уулум берип койгон. Кийин ал алган акчасын кайтарып жатканда, атайын “пара алды” деген жалган жалаа жабышты”,- дейт депутат. Бул иш мурда эле каралып кайра жабылганын айткан депутат, мындай чечим мыйзамга ылайык келбей турганын билдирет.

Автор: Ширин Турдакунова