Кыргыз өкмөтүнүн алдындагы аялдар кеңеши 8-мартта жүрүшкө чыккан катышуучуларга карата милиция кызматкерлеринин колдонгон аракетин айыпташты

Кыргыз өкмөтүнө караштуу аялдар иштери жана гендердик өнүгүү боюнча улуттук кеңеш аялдарга карата жасалган зомбулуктун бардык түрүн айыптайт. Мындай маалыматты өкмөттүн басма сөз кызматынан билдиришти.

Агы ылайык, аялдар кеңеши 8-мартта зордук-зомбулукка каршы жүрүшкө чыккан катышуучуларга карата айрым милиция кызматкерлеринин колдонгон аракетин дагы айыптаган.

"Өлкөдө үй-бүлөдөгү зордук-зомбулук фактыларынын көбөйүшү, аялдарга одоно жасалган мамиле, ушул жылдын башында өлүм менен аяктаган окуялар олуттуу көйгөй болуп эсептелет жана мамлекеттин алдында үй-бүлөдөгү зомбулуктун алдын алуу, жөнгө салуу боюнча иш ыкмаларды кайра карап чыгуу милдети турат.

Зомбулуктун бардык түрлөрүнө жол бербөө жөнүндө калктын түшүнүгүн кеңейтүү жана үй-бүлөлүк, гендердик зомбулукка карата сабырсыздыкты көрсөткөн өлкө боюнча «үй-бүлөдөгү зордук-зомбулукка каршы 180 күн» маалымат кампаниясы жүрүп жатат, зомбулуктун алдын алуу боюнча кечиктирилгис чаралардын комплекси бекитилип, медиа план даярдалды.

Зомбулуктун бардык түрү – бул кылмыш жана кабыл алынгыс көрүнүш. Мамлекеттик органдардын, жарандык коомдун жана көңүл кош карабаган бардык жарандардын биргелешкен аракети менен гана үй-бүлөдөгү жана гендердик зомбулук сындуу көрүнүштү жоюуга жетишүүгө болот", - деп айтылат маалыматта.

2012-жылы түзүлгөн Улуттук кеңеш гендердик өнүгүү маселелери боюнча мамлекеттик саясатты иштеп чыгууга жана жүзөгө ашырууну координациялоочу консультативдик, кеңеш берүүчү орган болуп саналат.

Автор: Бактыгүл Султаналиева
Фото: Айсалкын Качкынбекова