Ак карлуу апрель: Жумушчулар Бишкекте карды гана эмес, кулаган дарактарды да тазалашууда

Өлкө аймагына 8-апрелден 9-апрелге караган түнү жааган кар Бишкек шаары үчүн дагы кесепетсиз өткөн жок. Кескин түрдө өзгөргөн аба ырайынан улам борбор калаада бак-дарактар кулап, айрымдарынын бутактары унааларды басып калды.

"Жылуу аба ырайынан кийин, апрель айында жааган кар биз үчүн күтүүсүз болду. Бишкектин бир топ аймактарында дарактар кулап калды. Бактыга жараша, жабыркагандар болгон жок", - деп билдиришти шаардык мэриянын басма сөз кызматынан.

"Бир топ мезгилден бери шаардын бак-дарактар фонду жаңылана элек. Сыртынан дарак таза көрүнгөнү менен, басымдуу бөлүгүнүн тамырлары чирип баштаган. Буга байланыштуу дарактар түндө жааган нымдуу кар жана катуу шамалга туруштук бере албай кулап калды. Учурда шаарды кардан жана келтирилген абалдан арылтуу боюнча бир нече бригада иштеп жатат. Жалпысынан шаар боюнча "Бишкек жашыл чарба" , "Тазалык" , "Бишкек жарык" , "Бишкек асфальт сервис" муниципалдык ишканаларынын кызматкерлеринен турган 24 мобилдүү бригада иш алып барууда", - деп жазылган маалыматта.

Мэрия шаар ичинде дагы кулаган, жыгылган дарактарды көрүп калган тургундар 0770 83 00 06 номуруна чалып билдирүүнү суранат.

Автор: Бактыгүл Султаналиева