Алмазбек Атамбаев: "Кытай менен бирге жаңы долбоорлорду иштеп чыгуудабыз"

“Ала-Арча” мамлекеттик резиденциясында бүгүн, 11-сентябрда Кыргызстан менен Кытай өкмөтүнүн ортосунда бир катар документтерге кол коюу болгон соң, президент Алмазбек Атамбаев сүйлөшүүлөр жемиштүү өткөндүгүн белгиледи. Айтымында, эки тараптуу кызматташтыктын азыркы абалы жана аны андан ары өнүктүрүү маселелери талкууланган. “Эки тараптуу мамилелерди стратегиялык өнөктөштүккө чейин көтөрүү тууралуу сүйлөштүк. Соода-экономикалык маселелер көтөрүлүп, Кытайдан инвестицияларды тартуу боюнча сүйлөшүүлөр болду. Ал эми Улуу Жибек Жолунда эркин экономикалык зона куруу тууралуу Кытайдын төрагасы Си Цзиньпиндин сунушун колдойм”,- деди Атамбаев. Ошондой эле өлкө башчы Кытайдын төрагасы менен биргеликте бир катар жаңы долбоорлор талкууланганын билдирди. “Аларды келечекте ишке ашырабыз. Кытайдын төрагасынын мамлекеттик сапары 2 мамлекеттин кызматташтыгынын деңгээлин көтөрөт. Кесиптешимдин мени Кытайга чакыруусун абдан жакшы кабыл алдым. Сүйлөшүүлөр жемиштүү болду”,- деди мамлекет башчы.

Автор: Ширин Жумадилова