Ош. Шаар бийлиги "базарда эт кымбаттай берсе, элге өзүбүз мал союп беребиз" дейт

Эгер жакын арада Ошто эттин баасы турукташпаса, шаар бийлиги элди эт менен камсыз кылуунун башка жолдоруна өтмөкчү. Ар бир кварталдык комиттерде мал союп, этти базардагыдан арзан баада таркатуу жолдорун карап жатат. Акыркы бир ай ичинде Ош шаарында эттин 20-30 сомго кымбаттап кетиши жашоочуларды нааразы кылууда.

Монополияга каршы мамлекеттик кызматынын шаардагы бөлүмү иликтөө жүргүзүп, баанын кымбатташы негизсиз экенин ырастаган эле. Кой эти 270 сом, уй эти 280 сомдон сатылышы керек экен. Бирок касапчылар буга каршы. Талаш тартыштардан кийин уй эти 290 сом, кой эти 300 сомдон сатылмай болду. Шаар бийлиги эки айдан кийин базарлардагы эттин бааларын текшерет, эгер кымбаттап кетсе анда жогоруда аталган ыкманы колдоно турганын мэриядан кабарлашты.

Автор: Аксана Паизова