УКМК: Кыргызстан Орусияга Азиз Батукаевдин ден соолугун текшерүү боюнча кат жолдоду

Кыргызстан Орусияга "мыйзамдагы ууру" Азиз Батукаевдин канын текшерүү боюнча кат жолдоду. Муну Улуттук коопсуздук мамлекеттик комитетинин Коррупцияга каршы күрөшүү кызматынын башчысы Бектен Садыгалиев 8-октябрдагы ЖКнын комитет жыйынында билдирди. Айтымында Батукаевдин ишин иликтөө аяктай элек. “Мамлекеттик жаза аткаруу кызматында иштеген 40 киши сурактан өттү, Нарындагы №24-убактылуу кармоочу жайы, медициналык текшерүүлөр боюнча документтер, диагноздор, Жаза аткаруу мамлекеттик кызматынын, дарыгерлердин жана шаардык соттун ич ара байланыштары текшерилди. 26 медициналык кызматкер сурактан өттү”,- деди Садыгалиев

Август айында Башкы прокуратура Орусиянын укук коргоо органдарына Азиз Батукаевдин канын текшерүү боюнча кат жолдогонун жана азырынча жооп келе электигин кошумчалады ал.

Автор: Айпери Ганыжан кызы