Бүгүн, 15-март, күнгө дүйшөмбү. Саясий окуялардан кабардар болууга үлгүрбөй калсаңыз, бул материал сиз үчүн. SUPER.KG порталы күн ичинде орун алган "туздуу" саясий окуялардын топтомун сунуш кылат.
Мирлан Жээнчороев Бабанов негиздеген "Республика" партиясынан чыгып кеткени айтылууда
SUPER.KG порталынын өздүк булагы Мирлан Жээнчороев "Республика" партиясынан чыгып кеткени тууралуу билдирди.
Маалыматка ылайык, Жээнчороев партиянын лидерлигин тапшырып берди. Эми депутат башка партия менен парламенттик шайлоого аттанышы мүмкүн.
Аны менен байланышуу мүмкүн болбой жатат. Ал эми анын партиялаштары маалыматты төгүндөп, маалымат таратыла турганын билдиришти. Бирок дале маалымат таратыла элек.
Эске салсак, Жээнчороев "Республика-Ата Журт" партиясынын тизмеси менен Жогорку Кеңештин депутаты болгон. Ал 2019-жылы "Республика" партиясынын лидери болуп шайланган.
"Жер Үйдөгү" фабриканын ачылышына Путин онлайн катышат
Президент Садыр Жапаров 17-мартта "Жер Үй" алтын кенине бара турганын SUPER.KG порталы өздүк булактарына таянып жазып чыккан.
Президенттик аппарат "Жер Үйдөгү" комбинаттын ачылышы Орусиянын президенти Владимир Путин онлайн катыша турганы боюнча расмий билдирүү таратты.
17-мартта "Жер Үй" кенинде алтын иштеткен фабриканын ачылышынын өтүүсү күтүлүүдө.
"Алтын чыгаруучу фабриканын кубаттуулугу жылына 1,3 миллион тонна руданы түзөт. Бардык казып алынган руда алтынды кайра иштетүүчү фабрикада кайра иштетилет, андан кийин Кыргыз Республикасынын аймагында тазаланат. Улуттук банк алтын куймаларды сатып алууда артыкчылыкка ээ болот", - деп жазылат президенттик аппараттын басма сөз кызматынан.
"Жер Үй" алтын кени Талас районунун Бекмолдо айылында жайгашкан. Садыр Жапаров мындан тышкары Таластын дагы кайсы жерлерине барары азырынча белгисиз.
Эске салсак, Садыр Жапаров 24-25-февралда алгачкы иш сапары менен Орусияга барган.
Роза Отунбаева менен Сооронбай Жээнбековду экс-президент макамынан ажыратуу боюнча кол топтолду
Мурдагы президенттер Роза Отунбаева жана Сооронбай Жээнбековду экс-президент макамынан ажыратуу боюнча бир жарым айда 30 миңдей кол топтолду. Бул тууралуу жарандык активист Чыңгыз Капаров SUPER.KG порталына билдирди.
"Бүгүнкү күндө 30 миңге чукул кол топтолду, биздин максат 300 миң кол топтоо. Жер-жерлерде кол топтоо уланып жатат", - деп билдирди Чыңгыз Капаров.
Буга чейин Чыңгыз Капаров экс-президенттерди макамынан ажыратуу боюнча кол топтоо иштери башталганын, анда 20 миң кол топтолгонун жана ага Роза Отунбаеванын 2010-жылы шайлоого катышпаганы, Сооронбай Жээнбековдун мөөнөтүнөн мурда кызматтан кеткени себеп болгонун айткан.
Бишкек шаардык кеңешине аттанган партиялардын бюллетендеги номурлары аныкталды
Бүгүн, 15-мартта Борбордук шайлоо комиссиясынын жыйыны өттү. Бишкек шаардык кеңешине шайлоого карата партиялардын бюллетендеги номурлары аныкталды.
- "Улутман”
- “Ыйман Нуру”
- “Наш народ”
- “Кыргызстан демократиялык кыймылы”
- “Замандаш”
- “Улуу-Журт”
- “Ишеним”
- "Эркин тандоо”
- "Эл бийлиги”
- "Кыргызстан коммунисттер партиясы”
- “Социал-демократтар”
- “Ата-Журт Кыргызстан”
- “Республика”
- “Айкол Кыргызстан”
- "Кыргызстан элдик-демократиялык партия”
- “Тынчтык”
- “Кыргызстан”
- "Кыргызстан жашылдар партиясы”
- “Ак Бата”
- "Кыргызстан социалдар партиясы”
- "Бүтүн Кыргызстан”
- “Эмгек”
- “Реформа”
- "Ынтымак"
- "Патриот".
