Ош шаарында бир катар спортчуларга акчалай сыйлыктар тапшырылды

Ош шаарында бир катар спортчуларга жана машыктыруучуларга акчалай сыйлыктар тапшырылды. Бул тууралуу шаардык мэриянын басма сөз кызматынан билдиришти.

Маалыматка ылайык, эл аралык мелдештерде ийгилик жараткан бир катар спортчулар сыйланды.

Сыйлангандар:

Грек-рим күрөшү боюнча Азия лицензиондук мелдештин жеңүүчүсү Акжол Махмудов - 100 миң сом;
Дзюдо боюнча Азия жана Океания чемпиондугунун коло медалынын ээси Кубаныч Айбек уулу - 50 миң сом;
Бокс боюнча жаштар арасында өткөн Дүйнө чемпиондугунда коло медалынын ээси Жантөрө Ташиев - 50 миң сом;
Грек-рим күрөшү боюнча Азия чемпиондугунун коло медалынын ээси Бексултан Махмудов - 50 миң сом;
Эркин күрөш боюнча Азия чемпиондугунун коло медалынын ээси Икрам Хажимуратов - 50 миң сом;
Мындан сырткары аталган спортчулардын машыктыруучуларына да 10 миң сомдон тапшырылды.

Вице-мэр Эмил Шадыханов Ош шаарынын мэри Таалайбек Сарыбашовдун атынан спортчуларды жана машыктыруучуларды жетишкен ийгиликтери менен куттуктап, жаңы жеңиштерди каалады.

Автор: Айжанар Рыспек кызы
Фото: Ош шаардык мэриясынын маалымат кызматы