Борбор калаанын айрым аймактарында газ жана ысык суу убактылуу берилбейт

Борбор калаанын айрым аймактарында газ жана ысык суу берүү убактылуу өчүрүлөт. Бул тууралуу Бишкек мэриясынын басма сөз кызматынан билдиришти.

"Газпром Кыргызстан" ишканасынын маалыматы боюнча, ушул жылдын 28-июнунан 9-июлуна чейин баш калаанын айрым райондорунда жаратылыш газын берүү убактылуу токтотулат. Буга газ түтүгүндөгү эски жабдууларды оңдоп-түзөө жана алмаштыруу себеп.

Газ берүүнү токтотуу төмөнкү көчөлөр менен чектелген: Садырбаев, Толстой, Ала-Арча, Миңжилкиев, Тыналиев, Масалиев, Жал-23.

Ошол себептен "Бишкек жылуулук" коммуналдык ишканасы төмөнкү даректерге ысык суу берүүнү токтотушу керек болот:

- Жал кичи району;

- Эне жана баланы коргоо улуттук борбору;

- №5 мончо жана кир жуучу комплекс;

- №20 кесиптик лицейи;

- №94 кесиптик лицей;

- №91 кесиптик лицейи.

Борбор калаанын мэриясы жана "Газпром Кыргызстан" компаниясы келтирилген ыңгайсыздыктар үчүн шаар тургундарынан кечирим сурап, абоненттерден тамак бышыруунун альтернативдүү булактарына өтүүнү суранат", - деп жазылат маалыматта.

Автор: Ырыскелди Салбаров