Өзбекстанда селдин кесепетинен 8 адам каза болду

Нөшөрлөп жааган жамгырдан улам коңшу Өзбекстандын Наманган облусунун Касансай шаарында сел жүрүп, анын кесепетинен 8 адам каза болду. Бул тууралуу аталган өлкөнүн Өзгөчө кырдаалдар министрлигине таянуу менен жергиликтүү басылмалары жазышты.

Маалыматка ылайык, 13-июль күнү саат 13:30 чамасында Касансай шаарында нөшөрлөп жааган жамгырдын кесепетинен сел жүрүп, Касансай дарыясынын жээгинен ашып кеткен. Алдын ала маалыматтар боюнча, табигый кырсыктын кесепетинен 8 жергиликтүү тургун каза болуп, 6 адам жаракат алган.

Учурда издөө иштери улантылууда.

12-июль күнү Кыргыз өлкөсүндө дагы 8 адамды сел агызып, анын ичинен 6 адам табылган. Кечээ, 13-июлда каза болгондордун сөөгү жерге берилди.

Сел Аксы районунун Жаңы-Жол, Ак-Жол айылдарында жүрүп, эки айылдан биригип 8 адам көз жумган. Алсак, Ак-Жол айыл аймагынан бир үй-бүлөнүн 6 мүчөсү менен 12 жаштагы бир баланы сел алып кетсе, Жаңы-Жол айыл аймагында көчөдө ойноп жүргөн 6 жаштагы баланы сел агызып кеткен.

Автор: Азат Бейшенбеков