Өзбекстанда 60 жаштагы киши төртүнчү аялын бычактап өлтүргөнгө шектелип кармалды

Өзбекстанда 60 жаштагы киши төртүнчү аялын мыкаачылык менен өлтүрүүгө шектелип кармалды. Бул тууралуу чет элдик маалымат каражаттары жазып чыгышты.

Андагы маалыматка ылайык, үрөй учурган кылмыш медициналык мекемелердин биринде 10-июль күнү саат 09:00 чамасында болгон. Анда шектүү киши аялын бычактап өлтүргөн. Маркум аял дал ошол медициналык жайда дарыгер болуп иштечү. Ал кылмышкердин жарандык никедеги төртүнчү аялы жана алардын чогуу жашап жаткандыгына дээрлик 7 жыл болгон.

Каза болгон аялдын кесиптештеринин айтымында, ал буга чейин бир канча ирет жолдошу спирттик ичимдигин көп ичерин жана күндө ызы-чуу чыгарып жатканын айтып, нааразы болгон. Учурда кылмыш иши козголуп, тергөө жүрүп жаткандыгы айтылат маалыматта.

Автор: Сезим Жумагулова