"Натыйжа болгон жок". 9-августтан тарта калкты тейлөө борборлору адаттагы иш графигинде иштеп баштайт

Республикадагы калкты тейлөө борборлорунун иши 9-августтан баштап стандарттык иштөө режимине өтөт. Бул тууралуу Санариптик өнүктүрүү министрлигинин маалымат кызматынан билдиришти.

Буга чейин 4-июлдан тартып өлкөнүн бардык калкты тейлөө борборлорунда саат 8:00дөн 19:00гө чейин иштөө графиги пилоттук режимде киргизилген. Өзгөртүүнүн максаты - жарандар үчүн мындай режимдин ыңгайлуулугун 31-августка чейин сыноо болчу.

"Бирок мындай иш тартибинин натыйжалуулугу болбогондуктан калкты тейлөө борборлорунун иштөө графигин баштапкы режимге кайтаруу чечими кабыл алынды.

9-августтан тартып калкка кызмат көрсөткөн борборлор жана жарандык абалдын актыларын, калкты каттоо жана паспорттоштуруу бөлүмдөрү саат 9:00дөн 18:00гө чейин стандарттык иштөө графигине өтүшөт", - дешет маалымат кызматынан.

Автор: Бактыгүл Момбекова