"Акыркы коңгуроо июнда". Жаңы окуу жылында кандай өзгөрүүлөр болот? Министрликтен жооп

Бүгүн, 13-август күнү өлкө боюнча жаңы окуу жылынын башталышына арналган маалымат жыйын өтүүдө.

Анда билим берүү жана илим министринин орун басары Надира Жусупбекова жаңы окуу жылы 15-сентябрда баштала турганына байланыштуу окуу жүгүртмөсүндөгү өзгөрүүлөр тууралуу айтып берди.

"Токтомго ылайык төмөнкү өзгөрүүлөр киргизилген:

* биринчи чейрек 15-сентябрда башталып, 5-ноябрда аяктайт.

* Каникул 8-ноябрдан 14-ноябрга чейин.

* Экинчи чейрек 15-ноябрдан 31-декабрга чейин.

* Кышкы каникул 1-январдан 10-январга чейин болот.

* Үчүнчү чейрек 11-январда башталып, 18-мартта бүтөт.

* 21-марттан 27-мартка чейин каникул.

* Төртүнчү чейрек 28-мартта башталып 8-июнда аяктайт.

Бир аз эле өзгөрүүлөр болду. Окуу жылын жыл сайын 25-майда аяктасак, быйыл 9-июнда акыркы коңгуроо болот. 9-класстар үчүн окууну бүткөндүгү тууралуу күбөлүктөрүн тапшыруу 11-июль болот. Ал эми 11-класстар үчүн 15-июль күнү тапшырылат. 9-11-класстар үчүн мамлекеттик сынактар 10-июндан 1-июлга чейин болот. Бул аралыкта калган класстар эс алууда болушат. Ал эми чет өлкөгө окууга тапшыра турган бүтүрүүчүлөргө бул өзгөрүүлөр кедергисин тийгизбейт. Өз убагында тапшырууга жетише алышат", - деп билдирди Жусупбекова.

Буга чейин быйыл билим берүү мекемелеринде жаңы окуу жылы 15-сентябрда башталары маалым болгон.

Автор: Айзада Кыдырмышева
Фото: Айзада Кыдырмышева