Кумтөр: Темир Сариевдин тарапташтары митингге чыгышты

Бүгүн, 25-август күнү Бишкек шаардык сотунун алдында мурдагы премьер-министр Темир Сариевдин тарапташтары митингге чыгышты. Алар Сариевдин бошотулуусун талап кылышууда.

Буга чейин анын жактоочусу биринчи инстанциянын чечимине даттанып, сотко кайрылган. Буга байланыштуу бүгүн анын баш коргоо чарасы каралат.

Эске салсак, Темир Сариев 3-августта "Кумтөр" иши боюнча УКМК тарабынан кармалган. Ал УКМКнын СИЗОсунда 30-сентябрга чейин камакта калтырылган.

Атайын кызмат Сариев экономика министри, ошол эле учурда тиешелүү мамлекеттик комиссиянын төрагасы болуп турганда Кумтөр кенин иштетүүдөн келип чыккан экологиялык зыяндын суммасын бир нече миллиард сомго аз көрсөткөнү, анын натыйжасында мамлекетке чоң зыян келтирилгени аныкталганын маалымдаган.

Автор: Гүлзина Каныбекова
Фото: Гүлзина Каныбекова