Камила Талиева гендердик өнүгүү боюнча көчмө жыйын өткөрдү

Кыргыз Республикасынын Вице-премьер-министри Камила Талиева 5-ноябрда гендердик өнүгүү боюнча Улуттук кеңештин көчмө жыйынын өткөрдү. Улуттук пландын аткарылышы боюнча мониторинг жасалгандыгын айтып: “Жер-жерлердеги анализ көрсөткөндөй, иш канааттандырарлык абалда эмес, пландалган иштердин көбү учурунда аткарылбай жатат”,- деди ал. Мындан сырткары мектеп менен бала бакчалардын жетишсиздигинен улам аялдардын 35,2 пайызы үй-бүлөлүк маселелер менен гана алек болуп жаткандыгын кошумчалады. “Өкмөт бул көйгөйгө өзгөчө көңүл бурууда. “Капиталдык салым” беренеси боюнча мектепке чейинки мекемелердин курулушу каралып жатат”,- деп белгиледи Талиева. Вице-премьер-министр үй-бүлөлүк зордук-зомбулукка учураган жана оор кырдаалдарга туш келген аялдар үчүн ачылган Токмок шаарындагы кризистик борборду барып көрдү. Кризистик борбор 2013-жылдан баштап ишке берилген. Социалдык мейманкананын имаратын оңдоого Токмок шаардык мэриясы тарабынан 700 миң сом бөлүнгөн.

Автор: Айпери Ганыжан кызы