Окумуштуулар быйыл Орусияга түшкөн метеориттин салмагын жана ылдамдыгын аныкташты

Орусиялык адистер жетектеген эл аралык окумуштуулар тобу февраль айында Орусиянын аймагына майда бөлүктөрү түшкөн метеориттин салмагын жана ылдамдыгын аныкташты. Бул тууралуу америкалык NASA уюму билдиргенин чет элдик ММКлар жарыялады. Жерге түшкөн метеорит калдыктарын жана окуянын көрүнүшү тартылган видеону изилдеп чыккан окумуштуулар төмөнкүдөй жыйынтыкка келишти: Атмосферага 11 тонналык асман телосу секундуна 19 чакырымдык ылдамдыкта келип кирген. Атмосфера менен кагылышканда ал талкаланып, майда бөлүктөрү жерге секундуна 30 чакырым ылдамдыкта келип түшкөн. Чачырандынын көбү абада күйүп кетип, жерге жеткен эмес.

Челябинск облусунун аймагына түшкөн метеорит калдыктарынын жалпы салмагы 4-6 тонна. Эң чоңунун салмагы 650 килограмм. Окумуштуулар салмагы 10 тоннадан ашкан асман телолору атмосфера менен 150 жылда бир жолу эмес, 30-40 жылда бир кагылышып турарын айтышууда.

Автор: Автандил Добулбеков