“Кыргызгазды” Орусиялык “Газпромго” сатуу боюнча макулдашууну ратификациялоо маселеси Жогорку Кеңеште каралат

Бүгүн, 11-ноябрда Жогорку Кеңештин Бюджет жана финансы боюнча комитетинин кезектеги жыйынында “Кыргызгаз” ААКсындагы Кыргызстандын 100 пайыз үлүшүн Орусиянын “Газпром” ААКсына сатуу боюнча макулдашууну ратификациялоо маселеси каралып, аны парламенттин кароосуна алып чыгуу чечими кабыл алынды. Бул туурасында Жогорку Кеңештин Басма сөз кызматы билдирет.

Энергетика жана өнөр жай министри Осмонбек Артыкбаевдин айтымында, өлкөдөгү газ түтүктөрүнүн 80 пайызы алмаштырууга муктаж. Сатып алган тарап ишкананын дебитордук жана насыялык карыздарын да төлөөгө тийиш. Келишим 25 жылга түзүлөт.

Ишкана директору Тургунбек Кулмурзаев: “Кыргызгаз” сатылып алынган соң, анын ордуна ошондой эле ишкана түзүлөт. Газдын баасы улуттук мыйзамдардын чегинде, кыргыз тарап менен макулдашуу аркылуу гана чечилет. Эң негизгиси, Кыргызстан газ боюнча үзгүлтүккө учурабайт”,- деп маалымдады.

Ал эми аталган комитеттин төрагасы Ахматбек Келдибеков кандай болгон күндө да Соцфонддун үлүшү сатылбашы керектигин баса белгиледи.

Айта кетсек, “Кыргызгаздын” 87,97 пайызы мамлекеттин үлүшү, 4,6 пайызы Соцфонддун үлүшү, калган бөлүгү жеке жактарга тиешелүү. “Кыргызгаз” ААКсы карызынын көптүгүнөн кыйын абалга тушуккан.

Автор: Бекжан Рыскулов