Адистер Бишкектин "Ош базарындагы" сатуучулар санитардык эрежеге баш ийбей тургандыгын айтышууда (фоторепортаж)

Жүзүн көрсөтпөөнү суранган Жаңы-Жер айылынын тургуну Жумагүл апа күнүгө "Ош базарына" келип бозо сатат. “Ой, кызым, бозону өзүбүз жасап, сатып жатпайлыбы. Мен ишенимдүү айта алам, менин бозом санитардык нормага жооп берет”,- дейт ал.

Бишкек шаардык санитардык- эпидемиологиялык көзөмөлдөө борборунун врачы Үмүт Сатыбалдиева бозо сатуучу айымдын иши туура эмес экенин айтты: “Өзүм жасап жатам дегени туура эмес. Бир эле чөйчөктөн бир нече адам бозо ичпеши керек. Ушуга окшогон иштер жугуштуу оорулардын жайылышына алып келет”,- дейт.

"Ош базарынан" бир көрүнүш

Жей турган наныбыз минтип таштандылар менен аралашып жатат.

"Ош базарындагы" эт сатылуучу жер

Мамлекеттик ветеринардык коопсуздукту коргоо инспекциясынын башкы инспектору Тазабек Бөкүшовго кайрылып көрдүк. Ал: “Эт сатып жаткан адам санитардык эрежелерди сакташы керек. Негизи, эт атайын эт илгичте илинип турушу зарыл. Эт сатылганга чейин муздаткычта сакталышы кажет”,- дейт.

"Ош базарында" сатылып жаткан тооктун сан эти

Бул көрүнүш да талапка жооп бербейт

Эт саткан жердеги абал

Мыйзамсыз дары-дармектерди сатып жаткан сатуучулар сүрөткө тартып жатканыбызга ачууланышып: “Бизге жашоо бербей турган болду булар!”- дешти.

"Ош базарында" сатылып жаткан дары-дармектер

Дарыгерлер жарандарды дарыларды дарыканадан гана сатып алууга чакырышат.

Базардан бир көрүнүш

"Ош базарында" чечилбеген көйгөй көп. Мисалы, эт жана тамак-аш саткан жайлардагы санитардык абал, мыйзамсыз сатылып жаткан дары-дармектердин сактоо жолдору жана мөөнөтү. Бул маселе боюнча биз Бишкек шаардык санитардык-эпидемиологиялык көзөмөлдөө борборунун врачы Үмүт Сатыбалдиева менен байланыштык.

Сатыбалдиева: "Бишкек шаарында же башка жерлерде болобу, базарлар жылына бир жолу текшерилип турат. Ал эми стихиялык соода-сатык кылган адамдарды бүгүн куусаң, эртең келет же башка жакка туруп алып сатышат. Кыскасын айтканда, биз алар менен мышык-чычкан ойноп жатабыз. Ар бир адам өзү ойлонуп иш кылбаса, мындай ишти токтотуу кыйынга турат”,- деп билдирди.

Төмөнкү сүрөттөр аталган базардын бүгүнкү абалын чагылдырат.

Автор: Даткайым Досматова
Фото: Даткайым Досматова