"Бардыгын жүрөккө аткан". Алтайда белгисиз адамдар 53 баш жылкыны атып кетишти

Орусиянын Алтай аймагында эки айылдын ортосундагы талаада белгисиз адамдар 53 баш жылкыны кулундары менен кошо атып кетишкен. Бул тууралуу орус басылмалары жазып чыгышты.

Маалыматка ылайык, жылкылар жайытта жайылып жүргөн жана ээси жылкыларды жумасына 2-3 жолу келип карап турчу.

"Ошол күнү досум экөөбүз жылкыларды карап келели деп чыкканбыз. Бирок жол коюу туман болгондуктан кайра артка кайтканбыз. Кечинде мага "жылкыларыңды атып кетишти" деген кабар келди", - деген жылкылардын ээси.

Жылкылар атайын кача албай турган жерге камалган жана бардыгы жүрөгүнө ок тийип өлгөн.

Келтирилген зыян 5 миллион рублга бааланган. Окуя боюнча полиция кылмыш ишин козгоду.

Автор: Азат Бейшенбеков