Орусияга сатылып кеткен 2 адам апта аягында Бишкекке алынып келинет

Москвага тилемчилик кылдыруу үчүн сатылып кеткен Токмок шаарындагы №2-жатак-мектептин 2 жашоочусу апта аягында Бишкекке алынып келинет. Бул тууралуу бүгүн, 20-ноябрдагы маалымат жыйынында социалдык өнүгүү министри Кудайберген Базарбаев билдирди.

"Министрлик аларды табуу үчүн бардык аракетин жасады. Москвага кызматкерлерди жөнөттүм. 24 жана 47 жаштагы жатак-үйдүн жашоочулары ишемби күнү мекенине кайтып келишет",- деди Базарбаев.

Мындан сырткары аталган жатак-үйдүн директору иштен бошотулганын кошумчалады.

Эске салсак, ушул жылдын октябрь айында Токмоктогу жатак-үйдүн директору II топтогу эки майыпты 500 долларга Орусияга сатып жибергени айтылган. Алар Москванын метролорундагы станцияларда кайырчылык кылышмак. Учурда аталган факты боюнча кылмыш иши козголуп тергөө жүрүп жатат.

Автор: Айпери Ганыжан кызы