Кудайберген Базарбаев, министр: “Кыргызстандагы психоневрологиялык диспансерлерде жашагандардын өздүк папкасы текшерилет”

Кыргыз Республикасынын Социалдык өнүгүү министри Кудайберген Базарбаев бүгүн, 21-ноябрдагы маалымат жыйынында “Кыргызстандагы психоневрологиялык диспансерлерде жашагандардын өздүк папкасы текшерилет” деп билдирди.

"Азыр министрликте маанилүү буйрукту даярдап жатабыз. Ага ылайык, Кыргызстандын аймагындагы бардык психоневрологиялык үй-интернаттары текшерүүгө алынат жана ал жакта жашап жаткан жарандардын папкалары да текшерилет. Ар бир бейтаптын папкасын карайбыз”,- деди ал.

Министр кыргызстандагы бардык диспансерлерди кыдырып чыкканын айтты. "Менин министр болуп келгениме 5 айдын гана жүзү болду. Ушул 5 айда мен Кыргызстандагы дээрлик бардык диспансерлерди кыдырып чыктым",- деди Базарбаев.

Мындан сырткары Социалдык коргоо министрлигинде 3 жыл ичинде 9-министр болуп дайындалганын айтып, жетекчилердин бат-баттан алмашуусу министрликтин кээ бир иштерине терс таасирин тийгизип жаткандыгын кошумчалады.

Автор: Айпери Ганыжан кызы