Бүгүн Жогорку Кеңеште жаңы депутат Эмил Жамгырчиев ант берет

Бүгүн, 2-мартта Жогорку Кеңеште жаңы депутат Эмил Жамгырчиев ант берет. Бул тууралуу парламенттин сайтына жарыяланды.

Ал "Альянс" фракциясынан Алтынбек Сулаймановдун ордуна депутат болуп келди.

Алтынбек Сулайманов 24-февралда президенттин Ысык-Көл облусундагы ыйгарым укуктуу өкүлү болуп дайындалган.

Эске салсак, Эмил Жамгырчиев менен Бактыбек Калмуратов 2020-жылдын 19-октябрында УКМК тарабынан кармалган. Алар аткезчилик боюнча козголгон кылмыш ишин оң жагына чечкени үчүн ишкерден пара алган деп айыпталган. 2021-жылы мамлекетке келтирилген 20 миллион сом зыян төлөнгөн.

2021-жылы ноябрда Биринчи Май райондук соту тарабынан жоюлуп кеткен Финпол кызматынын мурдагы төрагасынын орун басары Эмил Жамгырчиев акталган.

Автор: Жылдыз Джускембаева