Баткендеги чек арачылардын ок атышуусунан кийинки сүйлөшүү жыйынтыкталды

Кыргыз-тажик чек арасындагы эки өлкөнүн чек арачыларынын ортосундагы ок атышууга байланыштуу сүйлөшүү жыйынтыкталды. Бул тууралуу Чек ара кызматынын басма сөз кызматынан билдиришти.

Маалыматка ылайык, сүйлөшүү Баткен районуна караштуу Паскы-Арык аймагында болгон.

Анын жыйынтыгында төмөндөгүдөй чечимдер кабыл алынган:

- ар бир тарап 10-марттагы курал колдонуу менен орун алган чыр-чатакты өзүнчө териштирип, анын алдын ала жыйынтыгын 12-марттагы эки тараптын чек ара түзүмдөрүнун жолугушуусунда көрсөтөт.

- эки тарап тең чектеш жайгашкан айылдардын жергиликтүү жашоочуларына түшүндүрүү иштерин жүргүзүүнү улантат. Кыргыз өлкөсүнүн Баткен жана Тажикстандын Согдий облустарынын губернаторлору бүгүндөн баштап чыр-чатактарды болтурбоо жана аларды алдын алуу боюнча керектүү чараларды көрүп башташат.

Сүйлөшүүлөрдүн жүрүшүндө эки тараптын аскер кызматкерлеринин кыргыз-тажик мамлекеттик чек ара тилкесинде өзүн өзү алып жүрүү эрежелерин сактоо боюнча суроолор көтөрүлдү.

Кыргыз өлкөсү менен Тажикстандын чек ара өкүлдөрү чыр-чатак орун алган жерге тартылган кошумча күч, каражаттарды жана техникаларды туруктуу ордуна жайгаштырууну келишишти.

Саат 16:00гө карата кыргыз-тажик мамлекеттик чек ара тилкесинде кырдаал туруктуу.

Автор: Кенжебай Сатканалиев