Бишкекте уруксаты жок дары-дармек саткан 30 дарыкана аныкталды

Бишкекте уруксаты жок дары-дармек саткан 30 дарыкана аныкталды. Бул тууралуу Саламаттыкты сактоо министрлигинен билдиришти.

Маалыматка ылайык, Саламаттык сактоо министрлиги менен Дары-дармек каражаттары жана медициналык техника департаменти биргеликте дары-дармек каражаттарын жүгүртүү маселелери боюнча, ошондой эле дары-дармек каражаттарын мыйзамсыз сатууга бөгөт коюу максатында 2022-жылдын 4-апрелинен 10-майына чейин дарыканаларга, дарыкана пункттарына карата лицензиялык контролдоо иш-чараларын жүргүзүүдө.

Бул иш-чаралардын объективдүүлүгүн жана комплекстүүлүгүн камсыз кылуу максатында Саламаттыкты сактоо министрлигинин буйругу менен атайын комиссия түзүлдү.

Текшерүүнүн жүрүшүндө Бишкек шаарында уруксаты жок дары-дармек саткан 30 дарыкана аныкталды.

Дары-дармек каражаттарын жүгүртүү жана лицензиялоо эрежелеринин талаптарын бузуу менен фармацевтикалык ишти жүргүзгөн юридикалык жана жеке жактарга карата колдонуудагы мыйзамдардын чегинде чаралар көрүлөт.

Мындай текшерүүлөр республиканын башка аймактарында да жүрүп жатат, анын жыйынтыгы боюнча кошумча маалымат берилет.

Автор: Алина Айдарбекова