Ташкенттеги жыйында Шанхай кызматташтык уюмунун өнүктүрүү банкын түзүү сунушталды

Ташкентте бүгүн, 29-ноябрда Шанхай кызматташтык уюмуна мүчө-мамлекеттердин Өкмөт башчылар кеңешинин жыйынында премьер-министр Жантөрө Сатыбалдиев ШКУнун өнүктүрүү банкын түзүүнү сунуштады. Бул тууралуу өкмөтүн басма сөз кызматы билдирди.

Анын айтымында, уюмдун соода-экономикалык кызматташтыгы эң оболу артыкчылыктуу багыттардын бири болуп саналат.

"ШКУ өлкөлөрүндө натыйжалуу биргелешкен экономикалык жана инвестициялык кызматташтык үчүн бардык шарттар бар. Андыктан биз ШКУ алкагында 2012-2016-жылдардын аралыгында так экономикалык долбоорлорго артыкчылыктуу көңүл буруу менен бардык мүмкүнчүлүктөрдү ишке ашырууга аракет жасашыбыз керек. Бул жагдайда Кыргызстандын ШКУ өлкөлөрү менен товар жүгүртүүсү кыскарбай, 2013-жылдын 9 айында өткөн жылдын ушул мезгилине салыштырмалуу жогорулаган. Биздин өлкө Шанхай кызматташтык уюмунун алкагындагы долбоорлорду ишке ашырууга, анын ичинде аймактык транспорттук инфраструктуралык коридорду өнүктүрүүгө чоң маани берет",- деди Сатыбалдиев.

Мындан сырткары Кыргызстан ШКУга мүчө мамлекеттердин өкмөттөрүнүн ортосунда эл аралык автоунаа ташуулары үчүн ыңгайлуу шарт түзүү тууралуу макулдашууга кол коюуга кызыкдар экендигин билдирди.

Автор: Айпери Ганыжан кызы