2012-жылы мамлекеттик мекемелер тарабынан 1 миллиард 225 миллион сом сарамжалсыз пайдаланылган

2012-жылы мамлекеттик мекемелер тарабынан 1 миллиард 225 миллион сом сарамжалсыз пайдаланылган. Бул тууралуу бүгүн, 6-декабрда өткөн “Ата Мекен” фракциясынын кезектеги жыйынында КРнын Эсептөө палатасынын төрайымы Элмира Ибраимова билдирди.

Анын айтымында, 2012-жылы 1734 мамлекеттик мекеме менен мамлекеттик үлүшү 50 пайыздан көп болгон 381 чарбачылык ишкананын каржылык иштери текшерилген. Жалпысынан 196 бюджет түзүү жана аны аткаруу аудити жүргүзүлгөн.

Текшерүүнүн жыйынтыгында 2012-жылы 3 миллиард 568 миллион сом өлчөмүндөгү каржы тартибин бузуу фактылары катталып, анын 2 миллиард 925 миллион сому кайра кайтарыла турган болгон.

Элмира Ибраимованын маалыматына караганда, 2012-жылдын аягында кайтарылган каражаттын суммасы 1 миллиард 122 миллион сомду түзүп, ал кайтарыла турган каражаттын 38,4 пайызын жапкан. Бул көрсөткүч 2011-жылга салыштырмалуу 30 пайызга жогору. Учурда калган каражатты кайтарып алуу чаралары көрүлүүдө.

Автор: Темирбек Матаев