Садыр Жапаров Азия чемпиондугунда жеңишке жеткен балбандарды куттуктады

Президент Садыр Жапаров Казакстанда өтүп жаткан Азия чемпиондугунда жеңишке жеткен балбандарды куттуктады. Бул тууралуу өлкө башчынын социалдык тармактагы баракчасына жарыяланды.

"Казакстанда өтүп жаткан Азия чемпионатында спортчуларыбыздын бир тобу байгелүү орундарга ээ болгонуна кыргыз эли сүйүнүп, бири-бири менен кубанычтарын тең бөлүшүүдө.

Бул кубанычты тартуулагандар: алтын байге ээлери — Акжол Махмудов, Жоламан Шаршенбеков, Акылбек Талантбеков жана алтынга тете күмүш алган Үзүр Жусупбеков, коло байге ээлери — Роман Ким, Раззак Бейшекеев жана Адилхан Нурланбеков.

Бул да болсо кыргыз спорту өнүгүп жатканынан кабар берет. Балбандарыбызды бул жеңиши менен жалпы кыргыз элинин жана жеке өзүмдүн атымдан куттуктайм!

Ошону менен бирге алдыда килем үстүнө чыгып, өлкө намысын коргой турган кыздарыбызга ийгиликтерди каалап кетмекчимин", - деген өлкө башчысы.

Автор: Айжанар Рыспек кызы