Чолпон-Атада кыргыз-өзбек соода-экономикалык кызматташуу боюнча сүйлөшүүлөр өттү

Бүгүн, 16-август күнү Ысык-Көл облусунун Чолпон-Ата шаарында Кыргызстан менен Өзбекстан өлкөсүнүн ортосундагы өкмөттөр аралык эки тараптуу кызматташуу боюнча биргелешкен комиссиянын 10-жыйыны башталды.

Жыйын Министрлер кабинетинин төрагасы Акылбек Жапаров жана Өзбекстандын премьер-министри Абдулла Ариповдун төрагалыгы астында өтүүдө.

Жыйын башталар алдында эки өлкөнүн өкмөт башчыларынын тар чөйрөдөгү жолугушуусу өттү.

Анда соода-экономикалык, илимий-техникалык, маданий жана гуманитардык кызматташуу боюнча сүйлөшүүлөр болду.

Белгилей кетсек, кечээ, 15-август күнү өзбек премьер-министри Абдулла Ариповду өлкө башчы Садыр Жапаров кабыл алган.
Жолугушууда эки өлкө ортосундагы саясий, соода-экономикалык, маданий-гуманитардык жана эки тарапты тең кызыктырган башка чөйрөлөрдө кызматташууну мындан ары кеңейтүү жана тереңдетүү боюнча пикир алышуу болгону маалымдалган.

Өкмөттөр аралык комиссия - бул эл аралык мамилелердин атайын форматы (өкмөттүк аянтча). Ал Кыргыз Республикасынын жана башка өлкөлөрдүн ортосундагы эки тараптуу кызматташууга, экономиканын бардык негизги тармактарын камтыган тараптардын өз ара аракеттенүүсүнө мүмкүндүк берет.