Садыр Жапаров Ташкенттен ары Парижге жөнөп кетти

Өлкө башчы Садыр Жапаров Франциянын президенти Эммануэль Макрондун чакыруусу менен 9-11-ноябрда Париж тынчтык форумунун алкагындагы "Бир Планета Саммитине" катышуу үчүн жөнөп кетти.

Президенттин басма сөз кызматынан билдиргендей, иш сапардын алкагында мамлекет башчысы ЮНЕСКОнун башкы конференциясынын 42-сессиясына да катышат.

Ошондой эле Садыр Жапаров Франциянын президенти Эммануэль Макрон, ЮНЕСКОнун башкы директору Одри Азуле, Экономикалык кызматташтык жана өнүктүрүү уюмунун (ЭКӨУ) башкы катчысы Матиас Корман, Франциянын энергетика тармагындагы "Électricité de France" жана "Total" компанияларынын жетекчилиги менен сүйлөшүүлөрдү өткөрөт.

"Сапардын жүрүшүндө президент Жапаровдун катышуусунда биринчи кыргыз-француз бизнес-форумун өткөрүү пландаштырылууда", - деп айтылат билдирүүдө.

Белгилей кетсек, мамлекет башчысы 8-9-ноябрда иш сапары менен Өзбекстандын Ташкент шаарында болду.

Автор: Бек Оморбеков