"Биздин жарандар жомокко жакшы ишенишеби...". Дастан Бекешев алдамчылык боюнча маселени көтөрдү

Алдамчылык боюнча маселе парламентте бир канча жолу көтөрүлдү. Бирок ага карабай элди алдап кеткендердин саны азайбай жатат. Мындай пикирин парламенттин бүгүнкү, 30-ноябрдагы жыйынында эл өкүлү Дастан Бекешев көтөрдү.

"Сатурн менин конушум" деп аталган компаниядан жабыр тарткан жаран мага кайрылды. Алар ипотекалык турак жай беребиз деп жарандардан акча алып, жок болуп кетишиптир. Алар азыр Кыргызстанда жок, чет өлкөгө чыгып кетип, укук коргоо органдары аларга издөө жарыялашкан.

Мындай учурлар көп болот. Инстаграмды ачсаң дагы толтура жарнамалар жүрөт. Алардын шарттарын окуп күлкүң келет. Мен түшүнбөйм, биздин жарандар жомокко жакшы ишенишеби же ошончолук ишенчээк келишеби, иш кылып ишенип жүрүшөт. Эч нерсени текшербей эле, акчаны берип коюшат. Ошондуктан жарандарга кеңеш бере турган борбор ачуубуз керек. Ал жерге юристтерди, экономисттерди отургузсак, онлайн консультация аркылуу жарандарга жардам беришсе, алдын алууда бир топ эле жардам болмок", - деди депутат.