Лазат Нуркожоеванын жигити 3-августка чейин камакка алынды

Президент Садыр Жапаровдун инисинин кызы Лазат Нуркожоеванын жигити Афтандил Сабырбеков 3-августка чейин камакка алынды. Бул тууралуу бүгүн, 10-июлда SUPER.KG порталына Бишкектин Биринчи май райондук сотунан кабарлады.

Маалыматка ылайык, райондук соттун 6-июлдагы чечими менен ИИМдин тергөөчүсүнүн өтүнүчү канааттандырылган.

"Сотко берилген материалдарга ылайык, С.А. Кылмыш-жаза кодексинин 282-беренесинин (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) 3-бөлүгү менен айыпталууда", - дешти соттон.

Кечээ айрым маалымат каражаттары Афтандил Сабырбеков синтетикалык баңгизат сатууга шектелип милиция кызматкерлери тарабынан 5-июлда кармалганын жазып чыгышкан.

Ал укук коргоо органдары тарабынан кармалганын президенттин басма сөз катчысы Аскат Алагөзов 10-июлда ырастады.

Эске салсак, 24-июнда Лазат Нуркожоеванын жигити тик учак менен сүйгөнүнүн колун сураган видео социалдык тармактарга тараган. Бул коомчулуктун сынына кабылып, айрымдары аша чапкандык экенин айтышкан.

Көп өтпөй президент Садыр Жапаров болочок күйөө баласы жаштык кылганын айткан.

Автор: Айпери Бакталбек кызы