Жалал-Абад облусунун Кетмен-Төбө шаарчасынын калкына таза суу күнүнө эки саат гана берилип жатат

Өкмөттүн Жалал-Абад облусундагы ыйгарымдуу өкүлү Жусупжан Жээнбеков Кара-Көл шаарына болгон иш сапарында Кетмен-Төбө шаарчасынын калкы менен жолугушту. Бул тууралуу бүгүн, 14-июлда өкүлчүлүктүн басма сөз кызматы билдирди.

Маалыматка ылайык, 1700гө жакын калк жашаган Кетмен-Төбөнүн эли таза суу чыгарып берүүчү насостук станция иштен чыгып, Чүкөлүү-Булак суусу токтоп, күнүнө 2 саатка гана суу берилип калгандыгын айтышты. Жергиликтүү калктын арыз-муңун жеринде уккандан кийин Ж.Жээнбеков өкүлчүлүктүн фондунан 250 миң сом бөлүп берген.

Шаарчанын калкынын негизги көйгөйү болгон таза суу маселесин чечүү Кара-Көл шаарынын мэри Мамбет Койчиевдин жеке жоопкерчилигине жүктөлүп, ишти бүткөрүүнүн акыркы мөөнөтү 20-июль деп белгиленди.

Автор: Айсана Паизова
Фото: Жалал-Абад өкүлчүлүгүнүн басма сөз кызматы