Түштүк аймактагы буу казандарды көмүргө которуу жана керектөөчүлөрдү суюлтулган газ менен камсыздоо үчүн 261 миллион сом акча каражаты бөлүндү

Түштүк аймактагы буу казандарды көмүргө которуу жана керектөөчүлөрдү суюлтулган газ менен камсыздоо үчүн 261 миллион сом өлчөмүндөгү үстөксүз бюджеттик ссуда бөлүндү. Тиешелүү токтомго Кыргыз Республикасынын премьер-министри Жоомарт Оторбаев кол койгон. Бул тууралуу КР Өкмөтүнүн аппаратынын маалыматтык камсыздоо бөлүмү бүгүн, 2-августта билдирди.

Маалыматка караганда, бюджеттик ссуда “Электр станциялары” “Кыргызстандын улуттук электр тармагы”, “Ош электр”, “Жалал-Абад электр” акционердик коомдоруна жана Ош шаардык мэриясына берилет. Бөлүнгөн акча каражаты Ош шаарындагы кварталдык тармак бөлүгүн оңдоого, Ош шаардык 4 электр буу казанын көмүргө өткөрүүгө, жаратылыш газын колдонуучуларга газ баллондорун жана плиткаларды сатып алууга, ар кыл кубаттуулуктагы трансформаторлорду сатып алууга жана орнотууга жумшалат.

Эске сала кетсек, 2014-жылдын 14-апрелинен тарта республиканын түштүгүнө жаратылыш газын берүү токтотулган. Натыйжада энергия керектөөчүлөрдүн саны көбөйүп жана авариялык өчүүлөр 20% пайызга жогорулаган.

Автор: Бекжан Рыскулов