Америкада төрөлүп-өскөн кыргызстандыктардын балдарына алиппе китеби даярдалууда

Америкада төрөлүп-өскөн кыргызстандыктардын балдарына кыргыз тилин үйрөтүү жана мекенин таанытуу максатында атайын алиппе басылып чыгарылат. Бул тууралуу бүгүн, 16-январда "Kyrgyz USA community" жаштар коомунан билдиришти.

"Чет жерде жүргөндө айлана-чөйрөнү чет тил курчап, эне тилибиз унутта калып кетчү коркунуч бар. Балдарга кыргызча сүйлөп, кыргызча жомок айтып, кыргызча китеп окумайынча алар кыргыз тилин үйрөнүшпөйт. Кыргыз тилин сактап калуу, тилибизди байытуу - ар бир кыргыздын милдети. Андыктан "аракетке берекет" деп, мекенчил сезимди туу тутуп, кыргыз тилин үйрөтүү максатында аталган китепче быйыл басылып чыгарылат",- деп билдиришет жаштар коомунан.

Алиппе Америкадагы кыргыздарга ылайыкташтырылып, 54 беттен турган заманбап журнал форматында жана системдүү түрдө жылына бир нече жолу басылып чыгат. Китепченин бет ачары жакынкы арада болот.

Автор: Динара Абдыкадырова