Кыргыз өлкөсүндө калктын 26,7 пайызын төрөткө жөндөмдүү айымдар түзөт

Кыргыз өлкөсүндө калктын 26,7 пайызын төрөткө жөндөмдүү айымдар түзөт. Бул тууралуу социалдык өнүгүү министринин орун басары Эрик Күйкеев Женевада өткөн БУУнун Аялдарга карата дискриминациянын бардык түрүн жоюу комитетинин 60-сессиясында билдирди.

Докладда өлкөдөгү өспүрүм кыздар калктын 2,7 пайызын түзөрү айтылган. Социалдык өнүгүү министрлиги 26-февралда билдиргендей, былтыр өлкөдө 159 634 ымыркай төрөлгөн (2013-жылкыга салыштырмалуу 4114 ымыркайга көп).

"Кыргыз Республикасы 2012-жылы Борбор Азияда биринчи жолу 2020-жылга чейин гендердик тең укуктуулукка жетишүү боюнча улуттук стратегияны - узак мөөнөттүү документти кабыл алды. Документте аялдардын мүмкүнчүлүктөрүн ишке ашырууга шарт түзүү чаралары, анын ичинде айылдык аялдардын, ден соолугунун мүмкүнчүлүгү чектелүү жана башка топтогу аялдардын кызыкчылыктарын коргоо чаралары камтылган",- деп билдирди Күйкеев.

Автор: Автандил Добулбеков